Mandubi-Zahar haragi ekologikoa | Gipuzkoako Behi Txarolesa

Mandubi-Zaharren Goi Eko Haragia osatzen dugu. Goierriko sei ekoizlek osatzen dugu kolektibo hori, eta ziurtagiri ekologikoa duen behi haragia hazten dugu.

Abeltzaintza ekologikoan animalien bizi-baldintzak eta ziklo naturalak errespetatzen ditugu. Bere elikadura baserriko bazkan eta larreetan oinarritzen da, pestizidarik, herbizidarik eta ongarri kimikorik gabeko ingurunean haziak.

Gainera, modu mugatuan ematen diegun pentsu ekologikoa tokikoa da, transgenikorik eta gehigarririk gabea. Horri esker, lortzen dugun haragia osasungarria eta zapore bikainekoa da, garbia eta mineraletan, omega 3n eta bitaminetan aberatsagoa.

Kimikorik eta hondakinik gabe

Erabiltzen ditugun elikagaiak — bai gure belardietako bazkak, bai erosten ditugun zerealak edo lekaleak — ekologikoak dira. Ez da herbizidarik, pestizidarik edo ongarri kimikorik erabiltzen, eta, beraz, ez da hondakinik geratzen ez gure haragian ez inguruan. Horrela zaintzen ditugu gure osasuna eta ingurumena, gugandik hasi eta azken kontsumitzailearenganaino.
Abeltzaintzako karga jasangarria

Animalia-karga (abere-kopurua/larre-hektarea) askoz txikiagoa da ekologikoari dagokionez. Ez dugu minda soberakinik; aitzitik, sortzen dugun guztia beharrezkoa da lantzen ditugun baratzeak, fruta-arbolak eta belardiak ongarritzeko. Ziklo osoa ixtea da gure funtsezko printzipioetako bat.
Zereal gutxiago, larre gehiago

Ekologikoan, behiek zereal gutxiago eta belar gehiago jaten dute. Pentsu kantitatea egunean gehienez 4 kg-ra mugatzen da (sistema intentsiboetan nahi adina jaten dute, 8-10 kg egunean). Horrela, kilo bat haragi ekoizteko pentsu gutxiago behar dugu, eta energia errendimendua hobea da, funtsezkoa jasangarritasunaren ikuspegitik. Gainera, pentsuaren osagaiak (zerealak eta lekaleak) ahalik eta hurbilen etor daitezen lan egiten dugu, multinazionalen mendekotasunetik urrun.
Animalien ongizatea

Ahal den guztietan, gure behiak aske bazkatzen dira. Neguan edo eguraldi txarragatik ukuiluan egon behar badute ere, kanpora sartzeko aukera dute. Gizentzeko txahalak gehienez hiru hilabetez egon daitezke irteera librerik gabeko ukuiluan.

Lactancia materna hasta 8-10 meses

Jaiotzen direnetik 8-10 hilabetera arte, txahalak amarekin egoten dira une oro. Bizitzako lehen hilabete hauetan, amaren esnea da bere elikaduraren oinarri nagusia, hiltzerakoan haragiaren kalitaterako faktore erabakigarria baita. Lehenengo asteetan esnea bakarrik hartzen dute. Elikagai solidoak jateko gaitasuna garatzen dutenean, amaren esneaz gain, belarra bazkatzen hasten dira. Proteina ekarpen osagarri gisa, hirugarren hilabetetik aurrera zereala ere ematen diegu egunean behin.

Titia kentzea eta gizentzea (8-10 hilabete)

8-10 hilabetera, txahalak eta amak banandu eta titia kenduko diegu. Bereizi egingo ditugu birjartzeko emeak eta gizentzeko txahalak: birjartze-emeak hazkuntza-aziendatik bereizitako larreetara joaten dira; gizentzekoak, ukuilura.
Gizentzeko elikadura

Ukuiluan daudenei gure ustiategian ekoitzitako bazka eta kanpoan erositako belar eta pentsu ekologikoa ematen dizkiegu. Pentsua egunean bitan ematen da, gehienez 3-4 kg egunean. Pentsu ekologiko honek osagai garbiak ditu, gehigarririk gabe: artoa ( % 45), garagarra ( % 30) eta baba ( % 25). Olaberriko Goierri Nekazaritza Kooperatiban erosi genuen, pentsu ekologikoa prestatzen den Gipuzkoako leku bakarrean.
Belarra nagusi

Txahalen gizentzeko elikagai gehienak ( % 60 baino gehiago, araudi ekologikoaren arabera) belarrezkoak dira. Behar den bazka ekoizten dugu gure baserrietan bertan, inguruko belardietan. Urte osoan larreetan jaten duten belar berdeaz gain, negurako (edo eguraldiak laguntzen ez duenean) bi bazka mota gordetzen ditugu: siloratua eta belar lehorra.